- 49 -

1356. Februar 12.

Nos Nicolaus dei gracia Oppauie et Rath. dux Fatemur presentibus universis Quod coram nobis constituti fideles nostri videlicet Nicolaus Advocatus Rath. hereditarius necnon Sorores eiusdem Ysentrudis et Katherina, non compulsi nec coacti Sed sana mente ac corporis sospitate Bonaque deliberacione prehabita et matura, Renunciantes devote in Cristo et Serenissime Domicelle Eufemie nostre proxime Sorori, Rath. sub voto et professione Ordinis sancti Dominici apud Rathibor in Monasterio Sanctispiritus Beateque Marie semper virginis ac Beati Johannis Apostoli et Ewangeliste divinis obsequijs mancipate Totique conventui Sanctimonialium eiusdem Monasterij ac totaliter ipsi Monasterio Quatuor marcas Reddituum seu annui Census, quas Jacobus quondam ibidem Rath. Advocatus dicti Nicolai Advocati, Ysentrudis et Katherine progenitor, in et super Civitate nostra Saar longo tempore tenuit hereditarie et possedit, Cum omnibus alijs pecunijs Margarethe ipsorum Sorori ad Claustrum predictum donatis, Nichillominus se de dicto Censu et alijs pecunijs ut premittitur tam libere alienando abrenunciantes, quod nulla fraude seu dolo, excepcione impeticione vel repeticione Juris tam Canonis quam Civilis in parte vel in toto, Predicti Nicolaus Advocatus, Ysentrudis et Katherina vel sui universi heredes valeant impetere vel quoquomodo arrestare, Set pocius ad prenotatum Claustrum et conventum omni Jure et condicione debentur eternaliter pertinere. Quam Renunciacionem ratam et firmam habere volentes Ipsam in omnibus clausulis et articulis approbamus et fideliter nostrarum litterarum tenore confirmamus. In cuius rei Testimonium presentes ex certa nostra Sciencia conscribi fecimus et nostri Appensione sigilli muniri. Actum et datum Rath. Anno domini Millesimo Trecentesimo Quinquagesimo Sexto, proxima feria sexta post Octavas Purificacionis Beate Marie Virginis Gloriose.

Mit anhangendem kleinem Wappensiegel, demselben welches sonst als Rücksiegel dient.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.